AÇG üzrə sazişin operatoru olan BP özünü texnologiyalara əsaslanan şirkət hesab edir. AÇG yatağının işlənməsi ilə əlaqədar fəaliyyətlər bu təcrübəyə əsaslanır və ənənə üzərində qurulan investisiya xarakteri daşısa da, texnologiya sahəsində də öz zamanını qabaqlayaraq sənayenin ən müasir innovasiyalarını Xəzər regionuna gətirmişdir.

bp-nin özünün bir çox yeni texnologiyaları Azərbaycanda AÇG yatağının işlənməsi ilə əlaqədar əməliyyatlar və layihələrdə uğurla tətbiq edilmişdir. Onlardan bəziləri isə ilk dəfə Xəzərdə tətbiq edilmişdir.

• Uzaq məsafəyə maili qazma (UMMQ) texnologiyası platformadan xeyli aralı  məsafədə yerləşən ehtiyatları hədəfləyən quyular qazmağa  və bununla da hasilatı artırmağa imkan verir. Bizim bu vaxtadək uzaq məsafəyə qazdığımız ən uzun maili quyu Çıraq platformasından 6,4 km məsafədə yerləşir. Biz inanırıq ki, bu texnologiya qarşıdan gələn onilliklər ərzində bizə AÇG yatağında maksimum neftverməyə nail olmağa imkan verəcək.
• Yüksək bucaqlı (qismən maili) qazma texnologiyası lay qalınlığının daha az, quyu dərinliyinin isə daha çox olduğu hallarda quyuların tamamlanmasına və beləliklə də hasilat səviyyəsinin artırılmasına imkan yaradır.
• “BP Well Advisor” proqram təminatı real-vaxt rejimindəki məlumatlardan istifadə edərək quyu əməliyyatlarının təhlükəsiz, etibarlı və səmərəli şəkildə həyata keçirilməsini təmin edir. Onun inteqrasiya olunmuş tətbiqləri bizə imkan verir ki, quyunun konstruksiyasındakı potensial problemləri bildirən erkən xəbərdarlıq indikatorlarını aşkarlayaq və quyunun real-vaxt rejimində toplanan müşahidə göstəricilərini əməliyyat qərarlarının verilməsində istifadə edək, qazma səmərəliliyini artıraq və qeyri-məhsuldar vaxtı azaldaq. “BP Well Advisor” proqramının Xəzərdə ilk dəfə  tətbiqi 2012-ci ildə hər üç Azəri platformasında və Dərinsulu Günəşli platformasında onun qoruyucu kəmərin endirilməsini izləyən funksiyasının tam işə salınması ilə başlayıb.
• bp 4-ölçülü seysmik tədqiqat sahəsində aparıcı mövqedədir və bu texnologiya artıq Xəzər dənizində tətbiq edilib. 2024-cü ilin yanvarında biz AÇG yatağında yeni 4 ölçülü (4D) yüksək dəqiqlikli dənizdibi qovşaqlarla seysmik tədqiqat proqramına başlamışıq. Tədqiqatın əhatə edəcəyi ərazi, aparılacaq işlərin ümumi dəyəri və müddəti baxımından bu layihə bp-nin dünyada indiyədək həyata keçirdiyi ən böyük seysmik məlumat toplama proqramıdır. AÇG yatağının hazırkı məhsuldar layları olan Balaxanı və Fasilə dəstlərinin tədqiqinə yönəlmiş bu proqram seysmik mənbənin altında 740 kvadrat kilometr, qəbuledicilərin altında isə 507 kvadrat kilometrlik bir ərazini əhatə edir. Proqramın ümumi dəyərinin təxminən 370 milyon ABŞ dolları, icra müddətinin isə beş il (2024-2028) olacağı planlaşdırılır. Proqram üçün istifadə edilən ən müasir 4D texnologiyası yataq haqqında yeni və daha dərin məlumatlar əldə etməyimizə imkan verəcək və gələcəkdə quyularda gözlənilməz halları minimuma endirmək və növbəti onilliklər ərzində yatağın neftvermə əmsalını maksimuma çatdırmaq üçün həll yolları müəyyənləşdirməyə kömək edəcək.
• bp şirkəti Azərbaycanı quyuların tamamlanması sahəsində texnoloji təcrübənin əsas mərkəzi hesab edir. Fiber-optik kabellərlə təchiz edilmiş açıq lülədə çınqıl kipkəcli süzgəclər və iri diametrli borular kimi tamamlama texnologiyaları quyudan çıxan qum miqdarına nəzarət etməklə yanaşı hasilatın daha yüksək templərlə həyata keçirilməsinə imkan verir. Digər bp regionlarında tətbiq edilməsindən əvvəl istismar müddətinin ilk günlərində AÇG-də qumlu laylar üçün nəzərdə tutulmuş müxtəlif növ tamamlama texnologiyaları (Qoruyucu Kəmər Yerləşdirilmiş və Perforasiya Edilmiş, Avtonom Süzgəclər, Genişlənən Qum Süzgəcləri, İlkin Kipkəcli Süzgəclər və Açıq Lülənin Çınqıl Kipkəcli Süzgəci kimi) quraşdırılmış və sınaq edilmişdir.Hazırda AÇG-də istismarda olan quyuların standart tamamlanma konstruksiyasında açıq lülənin çınqıl kipkəci (ALÇK) tətbiq olunur. Bu, 2000-ci illərin əvvəllərində əsl irəliləyiş idi və biz bu texnologiyanı indi də effektiv hesab edirik. Quyuların əksəriyyəti təbii propant materialı vasitəsilə kipkəclənir, lakin son vaxtlar qeyri-radioaktiv izlənə bilən propant (doldurucu) materialından istifadə edilir. Həmin dövrdən etibarən ALÇK tamamlama texnologiyası çox təkmilləşib. AGT regionunda həmçinin lülənin yuxarı intervalının təkrar tamamlama işləri zamanı qoruyucu kəmər olan lülədə çınqıl kipkəcli tamamlama üsulunun mümkün tətbiqi nəzərdən keçirilib. Qoruyucu kəmərli lülədə çınqıl kipkəcli tamamlama vasitəsi 2017-ci ildə Şərqi Azəri yatağının D06 saylı istismar quyusunda müvəffəqiyyətlə quraşdırılıb.

Tamamlanma mərhələsində tətbiq olunmuş bir sıra yeni texnologiyalar AÇG yatağının işlənmə metodunu dəyişdirmiş və nəticədə quyular təkmilləşdirilmiş, lay-kollektorun istismar göstəriciləri yaxşılaşmış və geoloji-texniki tədbirlər ilə əlaqədar xərclər azalmışdır.

• 1. Paylanan temperatur sensorları (DTS). İlk fiber-optik kabel 2004-cü ildə AÇG hasilat quyusunda quraşdırılmışdır. Quyuağzı avadanlığa məhdud giriş-çıxış imkanı, müxtəlif lay-kollektor intervallarının ayrı-ayrı sahələrinin yüksək templə tükənməsi, ənənəvi istismar karotajı imkanlarının məhdud olması və s. amillər quyuların dinamikasını və lay-kollektorun istismar göstəricilərini nəzarətdə saxlamaq üçün quyularda daimi DTS fiber-optik kabellərinin quraşdırılması barədə qərarın qəbul olunması üçün əsas olmuşdur. Hazırda AÇG-nin quyu fondunda lay kəsilişinin davamlı monitorinqi aparılan 60-dan artıq istismarda olan quyu var. Bu isə daimi monitorinq texnologiyasının təkcə bp-də deyil, qlobal miqyasda da yataq səviyyəsində ən geniş tətbiqidir. Bundan əlavə, 2023-cü ildə bp-nin sənayedə ilk dəfə AÇG yatağında qoşa örtüklü fiber-optik kabeli müvəffəqiyyətlə quraşdırması DTS və paylanan akustik siqnal sensoru (DAS) məlumatlarının eyni vaxtda toplanmasına və monitorinqinin aparılmasına imkan yaratmışdır.
  2. Paylanan akustik siqnal sensorları (DAS). Ötən beş il ərzində bu texnologiya qum təzahürünün və quyu bütövlüyünün monitorinqi, həmçinin seysmik məlumlatların toplanması üçün geniş istifadə olunmuşdur. Bu, ənənəvi seysmik məlumatların keyfiyyətinin yaxşılaşdırıla biləcəyi sahələrdə, xüsusilə, yatağın tağ hissəsi boyu bütövlüyü təmin edərək və seysmik məlumatların keyfiyyətini artıraraq, quyu əməliyyatlarının daha təhlükəsiz və səmərəli şəkildə aparılmasına imkan yaratmışdır. bp quyuda DAS texnologiyasının daha çox üstünlüklərinin aşkara çıxarılmasına və yataq boyu tətbiq edilməsi istiqamətində çalışaraq, AÇG-də bir çox alqoritm və sınaqlar üzrə tədqiqatları ilk dəfə həyata keçirmişdir və bu sahədə fəaliyyətləri davam etdirməkdədir.
  3. Quyudaxili seysmik tədqiqat. Səthdən alınan seysmik məlumatların keyfiyyəti enerji itkisinə məruz qalır və buna səbəb mənbədən məhsuldar laya və sonra isə səthə doğru geri məsafə qət edən enerji impulslarında baş verən itkidir. Bir-istiqamətli enerji impulsunu qeydə almaq üçün quyu lüləsi daxilində qeydiyyat cihazının yerləşdirilməsi bu təsiri azaldır. Quyu daxilinə daimi fiber-optik kabel yerləşdirilərsə, bu fəaliyyət dəfələrlə təkrarlana bilir və beləliklə, quyu lüləsi ətrafında yüksək rezolyusiyalı 4-ölçülü təsvir təmin edilir. Bu da səthdəki seysmik cihazlara nisbətən daha dəqiq miqyasda maye hərəkətinə nəzarət etməyə və yaxud kollektordakı kiçik kipləşmə təsirlərini aşkar etməyə imkan verir. Bəzi AÇG quyularında quraşdırılmış fiber-optik kabel gələcəkdə 4 ölçülü seysmik məlumatların təkrar əldə olunması üçün istifadə olunacaq.
  4. Quyudibi axına nəzarət klapanı (QDAN).
  • Genişlənən qum süzgəcləri və quyudibi axına nəzarət klapanı ilə tamamlanmış dünyanın ilk sualtı suvurma quyuları 2008-ci ildə Dərinsulu Günəşlidə istismara verilib. Bu tamamlama texnologiyaları tələb olunan xüsusi vurucu quyuların sayını azaldıb və onları dəniz dibindən işə salmaqla biz 

• bp-də quyudibi axına nəzarət klapanı ilə təchiz edilmiş ilk ikizonalı suvurma quyusu 2017-ci ildə istifadəyə verilib. İki texnologiyanın birgə tətbiqi iki lay daxilində suvurmanı tənzimləməyə və qumlu laylarda çatların yayılmasını izləməyə və beləliklə iki vurma zonası boyunca qalınlıq üzrə paylanmanı təmin etməyə imkan verib.
  
• Dünyada DTS (paylanan temperatur sensorları) ilə təchiz edilmiş quyudibi axına nəzarət klapanına malik 3-zonalı suvurma quyusu 2018-ci ildə fəaliyyətə başlayıb. Bu isə çoxlaylı kollektorları müvafiq qaydada idarə etmək üçün AÇG-də bu inqilabi texnologiya üçün digər bir əlamətdar hadisə oldu və bu texnologiyanın bp-nin digər regionlarında tətbiqinə yol açdı.

bp həmçinin hasilat sisteminin hər bir elementi üçün müəyyənləşdirilmiş potensial riskləri azaltmağa və idarə etməyə yönəlmiş texnologiyalara diqqət yetirir. Bunlar  qumun quyuya çıxmasının qarşısını almağa (və ya azaltmağa) imkan verən texnologiyalar və yaxud quyu konstruksiyasında hidratları bərpa etmək üçün yeni vasitələr ola bilər:

• 1. Pulsasiyanı azaldan tənzimləyici qurğu. AÇG quyularında quyu lüləsində  pulsasiyanın yaranması hasilatın davamlılığı üçün başlıca riskdir. Pulsasiyanın yüksək amplitudada olması və yüksək dərəcədə dəyişkən templərlə lay təzyiqinin azalması quyularda potensial olaraq quma nəzarətin sıradan çıxması riskini yaradır. Bu, həmçinin texnoloji qurğuların işinin dayanması və səmərəliliyin itməsi üçün risk yaradır. Pulsasiyanı tənzimləməyə yardım edən bu texnologiya bütün AÇG platformalarında tətbiq olunub.
  2. bp-nin Təzyiq düşməsinə nəzarət bloku - quyu dayandırıldıqdan sonra yenidən istismara buraxılarkən qeyri-sabitlik və debitin həddən artıq artırılması AÇG quyuları qum təzahürünə meylli olduğuna görə qum təzahürünə səbəb ola bilər. Bu texnologiya quyuya sabit təzyiq düşməsi tətbiq etməklə quyudakı təzyiqi tükənmə üçün hədəf göstərici səviyyəsində saxlamağa imkan verir. O həmçinin quyuda debiti daha səmərəli və rəvan şəkildə artırmağa imkan verir.
  3. Hasilatın modelləşdirilməsi, monitorinqi və optimallaşdırılması üçün vasitə (APEX) - Yatağın İdarə Olunmasının optimallaşdırılması ilə əlaqədar çətinlikləri aradan qaldırmaq üçün quyu məhsuldarlığının optimallaşdırılması imkanını artırır.

• Ərsin (boru kəmərinin diaqnostika qurğusu) boru kəmərinin daxili vəziyyətini müayinə etmək, həndəsi göstəriciləri aşkarlamaq və qeydə almaq, boru kəmərləri ilə bağlı hər hansı korroziya məlumatlarını aşkar etmək üçün istifadə olunan xüsusi avadanlıqdır. Mühəndislərin boru kəmərinin daxilini görməsinə imkan yaratmaq üçün həmin məlumatlar ərsin borudan çıxarıldıqdan sonra kompüterə yüklənir. Bu proses həm də, avtomatlaşdırılmış diaqnostik ərsinləmə kimi də tanınır.
• Sualtı boru kəmərlərinin istismara yararlılığını təmin etmək üçün məsafədən idarə olunan aparatlardan və avtonom sualtı aparatlardan (ASA) istifadə etməklə ciddi müşahidə-nəzarət işləri aparılır. Bununla bağlı rastlaşdığımız çətinlik isə Xəzərin bulanıq sularına görə görünmə dərəcəsinin aşağı olmasıdır və bu, xüsusən də 25m-dən az dərinliyə malik sularda özünü büruzə verir. Buna görə də, biz boru kəmərinin istismara yararlılığını təmin etməzdən əvvəl Xəzər dənizində indiyə qədər heç vaxt istifadə edilməmiş bir sıra ən müasir avadanlıqlardan istifadə etmişik. Həmin avadanlıqlar akustik tədqiqatlar həyata keçirir, müvafiq qaydada fəaliyyət göstərir və müşahidə-nəzarət işlərinin daha sürətlə və səmərəli şəkildə yerinə yetirilməsinə imkan verir. Xəzər regionu ASA texnologiyasından istifadə edən aparıcı regionlardan birinə çevrilib və bu əməliyyatlarla bağlı bilgiləri və təcrübələri bp-nin digər ölkələrdəki layihələri ilə paylaşır.
• Bəzi AÇG platformalarında qurğu və konstruksiyaların yoxlanılması üçün səyyar defektoskop və dron tipli bəzi yeni texnoloji vasitələr uğurla tətbiq olunmuşdur. Həmin texnologiyaların bütün AÇG platformalarında tətbiq sahələrini genişləndirmək üçün onların inkişaf etdirilməsi imkanları qiymətləndirilir.
• Azəri Mərkəzi Şərqi (ACE) platforması Xəzər dənizində nəhəng AÇG yatağında quraşdırılmış yeddinci neft hasilatı platformasıdır və texnoloji və rəqəmsal baxımdan bp-nin dünyada idarə etdiyi ən qabaqcıl platformadır.
  1. ACE məsafədən idarəetmə konsepsiyasına malikdir – bu dəniz platforması quruda Səngəçal terminalında yerləşən idarəetmə otağından idarə edilir. ACE məsafədən işə salınmış ilk bp platformasıdır.
  2. ACE Səngəçal terminalına fiber-optik kabellə, dəstək vasitə olaraq isə Mərkəzi Azəri platforması ilə birbaşa görünüş xətləri vasitəsilə birləşib. Bu, platforma heyətinin sayını azaltmaqla əməyin təhlükəsizliyini əhəmiyyətli dərəcədə gücləndirir və məsafədən nəzarət konsepsiyasının effektivliyini təsdiqləyir. Bundan əlavə, ACE platformasında tam Kompleks Nəzarət və Təhlükəsizlik Sistemi (KNTS) funksiyası ilə təchiz edilmiş Fövqəladə Hal və Hadisə üzrə Sərəncam Qurğusunun (FHSQ) olması, əlaqənin itməsi halında, platformanı dənizdən idarə etməyə imkan verir.
  3. Platformada quyunun ötürücü siyirtmələri və kimyəvi maddələrin vurulması üçün avadanlıq dəstləri kimi insan əməyi tələb edən prosesləri avtomatlaşdıran texnologiyadan istifadə edilir. Bu texnologiyanın tətdbiqi operatorun vaxtına qənaət etməyə və səmərəliliyi artırmağa imkan verir.
  4. ACE platformasının həm üst modulların, həm də qazma qurğusunun sənədlərini, məlumatlarını və 3-ölçülü (3D) modelini özündə birləşdirən “rəqəmsal əkiz”i mövcuddur. Bu, əməliyyatlar qrupunun yenilənmiş sənəd və məlumatları tez və asan əldə etməsini təmin edir. Lazer skan təsvirlərinin istifadəsi ilə birlikdə “rəqəmsal əkiz” texnologiyası sahədə tədqiqatların tamamlanması üçün dənizə gedib-gəlişə olan ehtiyacı azaldır.

ACE platformasının layihələndirilməsi, tikintisi və istismara verilməsi zamanı emissiyaların azaldılması ən mühüm vəzifələrdən biri kimi müəyyən edilmişdir. Bunun üçün tətbiq edilən yeni üsullar bunlardır:

• Qazla işləyən tək generatorun quraşdırılması - ikinci və hətta üçüncü generatordan asılı olmaq əvəzinə, ACE üçün ehtiyat enerji yaxınlıqdakı Şərqi Azəri platforması vasitəsilə dəniz şəbəkəsinə qoşulmaqla təmin edilir.
• Maye və qaz sızmaları baş verərsə, onların tez aşkar olunmasını təmin etmək üçün platformanın hər yerində termal görüntü kameralarından istifadə edilir.
• İlk dəfə olaraq təhlükəsizlik sınaqlarının quruda, həm də azot qazından istifadə etməklə icra olunması - bu üsul bp-də ilk dəfə tətbiq edildi və gələcəkdə bp-nin digər layihələrində də istifadə oluna bilər.